अनुज्ञापत्र स्वतः रद्ध प्रावधानको कार्यान्वयन तत्काल स्थगन गर्न नेपाल औषधि थोक व्यवासायी संघको माग

हेल्थपत्र

२०८२ मंसिर १५ आइतबार

काठमाडौँ, १४ मंसिर । नेपाल औषधि थोक व्यवासायी संघले औषधि ऐन २०३५, दफा ११ (५) को अनुज्ञापत्र स्वतः रद्ध प्रावधानको कार्यान्वयन तत्काल स्थगन गर्न माग गरेको छ ।
संघका अध्यक्ष गणेश नेपाल र महासचिव राजेन्द्र थापाले आइतवार विज्ञप्ती जारी गर्दै औषधि ऐन २०३५ को दोस्रो संसोधन मार्फत् दफा ११ को उपधारा ५ अन्तर्गत् गरिएको नविकरण समयमै नगरे अनुज्ञापत्र स्वतः रद्ध मानिने व्यवस्था सच्याउन माग गरेको हो ।

संघले नवीकरण प्रक्रियालाई डिजिटल, पारदर्शी, छिटो तथा व्यवसाय मैत्री प्रशासनिक ढिलाइ र प्रणालीगत कमजोरीहरू पूर्ण रूपमा न्यूनिकरण गर्न आवश्यक कानुनी ÷ प्राविधिक संरचना अविलम्ब कार्यान्वयन गर्न राज्यको गम्भीर ध्यानाकर्षण गराएको छ । विज्ञप्तीमार्फत् दफा ११ को उपदफा (३) अन्तर्गतको दोब्बर दस्तुर तथा समयसीमाको विषयमा समेत पुनरावलोकन गर्न आग्रह गरिएको छ ।

नियमनको उद्देश्य, व्यवसायिक स्थिरता र सार्वजनिक स्वास्थ्यबीच सन्तुलित, स्थायी र व्यावहारिक समाधान सुनिश्चित हुने गरी दिगो नीतिगत प्रक्रिया सुरु गर्न माग गरेको छ ।
विज्ञप्तीमा भनिएको छ, ‘स्वास्थ्य मन्त्रालय, औषधि व्यवस्था विभाग र नेपाल औषधि थोक व्यवसायी संघबीच त्रिपक्षीय स्थायी संवाद समिति गठन गरी नवीकरण, नियमन, निरीक्षण तथा उद्योग–व्यवसायबीचको समन्वयलाई दीर्घकालीन रूपमा संस्थागत गरियोस् भन्ने आग्रह गर्दछौं ।’

संघका संस्थापक अध्यक्ष शिबराज बास्कोटाले अनुज्ञापत्र स्वतः रद्द हुने कठोर कानुनी व्यवस्था कार्यान्वयनमा आए हजारौं व्यवसाय र व्यवसायीको अस्तित्व संकटमा धकेलिने जोखिम रहने बताए ।

संघका संस्थापक अध्यक्ष बास्कोटाले भने, ‘२०७८ मंसिरताका व्यवसायी समूहहरूले जनाएको आपत्ति पछि सो प्रावधानलाई कडाइका साथ कार्यान्वयन नगर्ने सरकारी सहमति स्वयं एक महत्त्वपूर्ण नजीरको रूपमा विद्यमान छ । यद्यपि हाल पुनः उक्त व्यवस्थालाई कडाइका साथ लागू गर्ने संकेत सार्वजनिक रूपमा देखिन थालेपछि देशभरका औषधि व्यवसायीहरूमा अनावश्यक त्रास, अनिश्चितता र अस्थिरता तीव्र रूपमा बढ्नु किमार्थ औषधि व्यवसायी जगतका लागि सकारात्मक पक्ष मान्न सकिन्न ।’

यस्तै, औषधि व्यवसायीहरूले आज आइतबार विहान ११ देखि १२ बजेसम्म देशभरका औषधि पसल (फार्मेसी) बन्द गरेर विरोध प्रदर्शन गरेका थिए ।