आजदेखि शुरु हुन थालेको एचपिभी खोप कार्यक्रम के हो

हेल्थपत्र

२०८३ बैशाख ४ शुक्रबार

पाठेघरको मुखको क्यान्सर र एचपिभी

नेपालमा महिलाहरूमा हुने विभिन्न क्यान्सरहरू मध्ये पाठेघरको मुखको क्यान्सर दोस्रो स्थानमा रहेको देखिन्छ भने क्यान्सरको कारणबाट महिलाहरूको मृत्यु हुनेमा यो पहिलो स्थानमा रहको छ ।
नेपालमा औसतमा हरेक दिन ६ जना महिलाहरूमा पाठेघरको मुखको क्यान्सरको संक्रमण हुने गरेको छ भने ४ जना महिलाको यस रोगका कारण ज्यान जाने गरेको छ।
यो क्यान्सर मुख्य गरेर एच.पि.भी. भाइरसको संक्रमणबाट हुन्छ ।
एच.पि.भी. को २०० भन्दा बढी किसिमका प्रजातिहरू (serotypes) हुन्छन् र यसमध्ये कम्तिमा १२ वटा प्रजाति पाठेघरको मुखको क्यान्सर गराउने प्रमुख कारक मानिन्छ भने यस मध्ये पनि १६ र १८ प्रजाति प्रमुख कारक हुन् ।
नेपालमा ८० प्रतिशत पाठेघरको मुखको क्यान्सर १६ र १८ प्रजातिबाट भएको देखिन्छ ।
पाठेघरको मुखको क्यान्सर रोग निवारण गर्ने लक्ष्य हासिल गर्नेतर्फ उन्मुख हुन विश्व स्वास्थ्य संगठनले तीनवटा स्वास्थ्य सेवाहरूको गन्तव्य निर्धारण गरेको छ जसमा पाठेघरको मुखको क्यान्सर विरुद्धको खोप, उच्च गुणस्तरीय विधीबाट पाठेघरको मुखको परीक्षण र पाठेघरको मुखको क्यान्सर निदान भएका महिलाहरूको उपचार पर्दछन् ।
ती मध्ये नेपालमा दोस्रो र तस्रो सेवा विगत लामो समयदेखि उपलब्ध गराईदै आएकोमा गत वर्ष देखि यो रोग विरुद्धको एच.पि.भी. खोप सेवा देशव्यापी रुपमा सुरुवात गरिएको छ ।

एचपिभी खोप

खोपको नाम: सेकोलिन (Cecolin)
यो खोप एक मात्रा दिईने छ ।यो खोप एक मात्रालाई नै पूर्णमात्रा मानिन्छ ।
गत वर्षको अभियानमा एच.पि.भी. खोप लगाइसकेका किशोरीहरूले यो वर्ष खोप लगाउनु पर्दैन ।

आजदेखि सञ्चालन हुने एचपिभी खोप कार्यक्रम

पाठेघरको मुखको क्यान्सरलाई सन् २०३० सम्ममा जनस्वास्थ्यको समस्याको रुपमा नहुने अवस्थामा पुर्याएर निवारण गर्ने विश्वव्यापी लक्ष्य हासिल गर्ने तर्फ उन्मूख हुने उद्धेश्यले नेपालमा गतवर्षदेखि एच.पि.भी. खोपलाई नियमित खोपमा सुरूवात गरिएको छ ।
यहि माघ २५ गतेदेखि फागुन १५ गतेसम्म देशव्यापी रूपमा पाठेघरको मुखको क्यान्सर विरुद्धको एच.पि.भी. खोप कार्यक्रम सञ्चालन हुँदैछ।
अत्यधिक चिसो तथा हिमपातका कारण केही हिमाली जिल्लाहरूमा भने यो कार्यक्रम चैत्र–वैशाखमा सञ्चालन गरिनेछ।
खोप सेवा सञ्चालन हुने मिति र समय स्थानीय तह अनुसार फरक हुन सक्ने भएकाले आ–आफ्नो विद्यालय वा नजिकको स्वास्थ्य संस्थामा सम्पर्क गरी खोप लगाउन अनुरोध गरिन्छ ।
नियमित खोप कार्यक्रम अन्तर्गत कक्षा ६ मा अध्ययनरत सबै छात्रा तथा कुनै कारणबस विद्यालय बाहिर रहेका १० वर्ष उमेरका किशोरीहरूलाई एच.पि.भी. खोप दिईंदैछ ।
साथै गत वर्ष सञ्चालन भएको एच.पि.भी. खोप अभियानमा खोप लगाउन छुटेका हाल कक्षा ७ देखि १० सम्म अध्ययनरत छात्राहरू तथा विद्यालय नजाने ११ देखि १४ वर्षसम्मका किशोरीहरूलाई पनि यो वर्ष अन्तिम मौकाका रूपमा एच.पि.भी. खोप दिईनेछ ।
यो खोप मुख्यत: विद्यालय केन्द्रित खोप केन्द्रहरूबाट दिईने छ ।
यो वर्ष करिव तीन लाख ५० हजारभन्दा किशोरीहरूलाई एचपिभी खोप दिइनेछ ।
यो खोप नि:शुल्क छ, सुरक्षित छ र यो खोपले जीवन रक्षा गर्छ ।