धर्मभक्त राष्ट्रिय प्रत्यारोपण केन्द्रमा कलेजो प्रत्यारोपण रोकियो

हेल्थपत्र

२०८२ मंसिर १५ आइतबार

काठमाडौं, १० मंसिर । भक्तपुरस्थित शहिद धर्मभक्त राष्ट्रिय प्रत्यारोपण केन्द्रमा कलेजो प्रत्यारोपण रोकिएको छ । प्रमाणपत्र प्राप्त कलेजो प्रत्यारोपण सर्जनको अभावका कारण साउनयता कलेजो प्रत्यारोपण रोकिएको हो ।

अस्पतालका कार्यकारी निर्देशक डा.कल्पना श्रेष्ठले यस विषयमा स्वास्थ्य तथा जनसंख्या मन्त्री डा.सुधा शर्मा गौतमलाई भेट गरि जानकारी गराइसकिएको बताइन् । मन्त्री गौतमले पनि यस विषयलाई गम्भिरताका साथ लिएको उनले बताइन् । कलेजो प्रत्यारोपणलाई निरन्तरता दिन सर्जनहरु खोजिरहेको डा.श्रेष्ठले बताइन् । केन्द्रका अनुसार चार महिनामा कलेजो प्रत्यारोपण संख्या शून्य रहेको छ ।

हालसम्म केन्द्रबाट ३४ जनाको कलेजो प्रत्यारोपण गरिएको छ । यस्तै, १५ सय २६ जनाको मृगौला प्रत्यारोपण गरिएको केन्द्रका निर्देशक डा.श्रेष्ठले बताइन् ।
केन्द्रमा मृगौला प्रत्यारोपण नियमित र प्रभावकारी रूपमा हुँदै आए पनि कलेजो प्रत्यारोपण भने न्यून छ। कलेजो प्रत्यारोपण विश्वमै जटिल मानिने शल्यक्रिया भएकाले विशेषज्ञको अभाव मुख्य चुनौती भएको उनले स्पष्ट गरिन् ।

अघिल्ला निर्देशक डा. पुकारचन्द्र श्रेष्ठ स्वयं कलेजो प्रत्यारोपण सर्जन भएकाले ती क्रममा सेवा निरन्तर थियो । “सर्जन उपलब्ध भए हामी तुरुन्तै कलेजो प्रत्यारोपण सेवा विस्तार गर्न सक्छौँ,” भन्दै उनले मन्त्रालयलाई आवश्यक जनशक्ति व्यवस्थापनका लागि अनुरोध गरिसकेको बताइन् ।

यसैबिच केन्द्रका नवनियुक्त निर्देशक श्रेष्ठले पदभार सम्हालेसँगै सेवा सुधार र स्तरोन्नतीबारे स्पष्ट योजना अघि सारेकी छिन् । नेपालमा प्रत्यारोपण सेवा विकास गर्ने उद्देश्यले स्थापित यो केन्द्रमा आफू प्रस्ताव समिति सदस्य हुँदादेखिकै यात्रालाई सम्झँदै निर्देशक श्रेष्ठले ‘निर्देशक हुने अवसर पाउनु गर्वको विषय’ बताइन् ।
अघिल्लो पुस्ताका निर्देशकहरूले राखेको जगमा आज देशमै प्रत्यारोपण सम्भव भएको भन्दै उनले विदेशिनुपर्ने बाध्यता कम भएको र नेपालीको पैसा देशमै बच्न थालेको उल्लेख गरिन् ।

अस्पतालको स्तरोन्नतीबारे कर्मचारीको स्थायीत्व नै गुणस्तरीय सेवालाई आधार दिने बताइन् । “काम गर्ने कर्मचारी खुसी हुनुपर्छ, तबमात्र राम्रो सेवा सम्भव हुन्छ,” भन्दै उनले लोकसेवामार्फत् पदपूर्ति र दीगो संरचनाका लागि पहल भइरहेको जानकारी दिए ।
तर, अस्पतालमा हुने स्पेसको अभाव सेवाको मुख्य चुनौती रहेको उनको भनाइ छ । ‘सेवा विस्तारका लागि ठाउँ नै अभाव छ, यसलाई समाधान गर्न मन्त्रालयसमक्ष पहल गरिरहेका छौं,’ उनले भनिन् ।