पिसीएल नर्सिङ अवरोध हटाउन जेनजी र सिटिइभिटीबीच छलफल
हेल्थपत्र
काठमाडौँ, ९ मंसिरः पिसीएल नर्सिङ सम्बन्धी अवरोध हटाउनका लागि जेनजी टु जेरो र प्राविधिक शिक्षा तथा व्यवसायिक तालिम परिषद् बीच भएको छलफल सक्रिय चरणमा पुगेको छ। सिटिइभिटीका सदस्य सचिव महेश भट्टराईसँग भएको भेटमा भट्टराईले भर्ना प्रक्रिया अघि बढिसकेको र केही प्राविधिक पक्ष मिलाएपछि चाँडै नै भर्ना खोलिने जानकारी दिएका छन्।
जेनजी टु जेरोका प्रवक्ता अबिन लिम्बुले विद्यार्थीका मुद्दा समाधान गर्न दबाबमूलक पहल जारी रहेको बताए। उनका अनुसार सिटिइभिटीलाई दिईएको ७ दिने अल्टिमेटम अनुसार संगठन अहिले वार्ता, भेटघाट र तथ्य संकलन गर्दै अघि बढिरहेको छ। उनले भर्ना प्रक्रिया कुनै पनि बहानामा रोकिएमा जनस्तरबाट कडा आन्दोलन शुरू गर्ने चेतावनी दिए।
उनका शब्दमा, “विद्यार्थीको भविष्यसँग खेलिनुले ठूलो अन्याय हुन्छ। हामी समाधान खोज्ने प्रयासमै छौं, तर ढिलाइ गरे आन्दोलन अपरिहार्य हुन्छ।”
त्यसैगरी जेनजी युनाइटेडका संयोजक जनक परियारले विद्यार्थीका सपना, पढाइ र समयको सम्मान गर्न सम्बन्धित निकाय गम्भीर हुनुपर्ने बताएका छन्। उनले अनावश्यक रोकिने क्रमले हजारौं युवाको भविष्य प्रभावित भएको भन्दै छिटो निष्कर्षमा पुग्न जोड दिए।
जेनजी टु।जेरो र जेनजी युनाइटेड दुवैले पिसीएल नर्सिङ सम्बन्धी समस्या समाधानका लागि साझा मोर्चाबाट दबाब दिने र विद्यार्थीलाई स्पष्ट दिशानिर्देश उपलब्ध गराउने प्रतिबद्धता दोहोर्याएका छन्।
सम्बन्धित खबर
सम्बन्धित समाचार
सबैभन्दा धेरै हेरिएको समाचारहरु
फेसबुक